Мектеп тарихы

№64 Жүсіпбек Аймауытов атындағы 

мектеп-гимназияның тарихы

Қаламыздың   Әл-Фараби ауданына  қарасты  Қарасу мөлтек ауданында 1991жылы  Тәуелсіздігімізбен бірге  өз тынысын алған  білім ордасы   бой көтерген еді.

 Бұл  №64 Қазақ орта мектебі деп аталынды.  Осы жылдары Алаш азаматтарының  есімдері ақталып,  халық көкейінде  қалған   тұлғалардың еңбектері мен ел үшін жасаған  істерін жас ғалымдарымыздың  ақтап жатқан заманы  болатын.   

Мектепке директор болып тағайындалып өз жұмысын  1967 жылы қаламыздың  мектептерінде   физика-математика пәнінің мұғалімі    болып бастаған Зәуре Садықбекқызы   мектепке «Бес арыстың»  бірі  Ж. Аймауытов атын беруді ұсынды. Қалалық Білім  бөлімінде де ұсыныс қабылданып, мектеп №64 Ж.Аймауытов атындағы орта мектеп деп аталды. 

Мектептің ашылу салтанатына  арысымыздың   көзінің қарашығындай  болған  Ақтөбе қаласынан Ж.Аймауытовтың қызы Муза апайымызбен, Ж.Аймауытов шығармаларын зерттеп жүрген Рахымжан Тұрысбек ағамызда арнайы келіп ұжым мен 

мектепке «Ар айнасы» атты екі бөлімнен тұратын  зерттеулер жинақ кітабын сыйға тартып, мектебіміздің қадамының нұр болуын тілеп, ыстық лебіздерін арнап жаңа ашылған білім ордасының ашылу салтанатына куә   болған еді. 

Тәуелсіздігімізбен   бірге тәй-тәй басып, ашылған бұл білім ордасының алғашқы 1992 жылдың бітіруші түлектеріне  атестатты  арнайы келген Муза апайымыздың өзі табыс еткен.

Өз жұмысын қарқынды бастаған бұл білім ордасы  бостандық таңымен  оянған талай түлектерді  рухани азықтандырып, бүгінде ел іргесін  қалап жүрген талай азаматтарды  шығарды.

Мектеп білім сапасы жағынан да, тәрбие ісі жөнінен де қалалық мектептер  арасында алдыңғы орындарда келеді. 

2001 жылы мектеп   №64 Ж.Аймауытов атындағы көпсалалы   мектеп-гимназиясына айналды.

2002 жылдан бастап мектеп ішінде  Ж.Аймауытов   атындағы мұражай бар.  Мұражайда Ж.Аймауытов туралы  құнды деректер, арысымыздың еңбектерін зерттеп жүрген Рахымжан Тұрысбектің «Ар айнасы» жинақтары, мектебіміздің оқытушылары құрастырған  Ф.Разова, Н.Б.Рүстемов, Ә.Сеңгірбаевалардың  «Жүсіпбектану»  оқу әдістемелік құралдары  және көптеген   Ж.Аймауытов өмірінен сыр шертетін тың деректерге толы материалдар,  мектеп жетістіктері  жинақталған. Бұл  мұражайдың    ұстаз қауым мен  оқушы қауымға жас зерттеушілерге берері мол.

2009 жылдан бастап мектеп №64 Ж.Аймауытов атындағы мектеп-гимназия болып өзгерді. 

2007 жылдан білім ордасын   бүгінде  Асылбекова Зейнегүл Атабекқызы басқарды.

2019 жылдың қаңтар айынан бастап білім ордасын Гүлхан Турсыметқызы Сандыбаева басқарып отыр.